منتديات مدرسة الأبداع الأهلية بالقطن
اهلاً وسهلاً بكم في منتديات مدرسة الأبداع الأهلية بالقطن


منتديات مدرسة الأبداع الأهلية بالقطن يرحب بكم
 
الرئيسيةالبوابةاليوميةس .و .جبحـثالأعضاءالمجموعاتالتسجيلدخول

شاطر | 
 

  ليش العالم يتكلم أكثر من لغة؟

اذهب الى الأسفل 
كاتب الموضوعرسالة
الادارة
Admin
avatar

عدد المساهمات : 115
تاريخ التسجيل : 15/04/2010
العمر : 23
الموقع : http://alabda.ibda3.org/

مُساهمةموضوع: ليش العالم يتكلم أكثر من لغة؟    السبت يناير 01, 2011 11:31 am

كنت قاعد بمكان ولا أسمع أم تقول حق بنتها الصغيرة: “ليش ما تسمعين الكلام؟ ولا لازم أكلمج بلغة ثانية؟ أي لغة لازم أتكلم عشان تفهميني؟!؟ هااا؟؟!؟” ،،، ولا أقعد أفكر:

ليش أصلا ما نتكلم لغة وحده بس بالعالم كله وماكو غيرها؟

يوم دوّرت بالأنترنت عشان اشوف شنو قايلين عن الموضوع أول شي شفت ويكيبيديا بس شفت السالفة طويلة وفيها تشعيبات وايد تاريخية ودينية، بس ماكو شرح منطقي عقلي واضح.

يعني كلنا بني آدم، ليش لي الحين ما نتكلم كلنا نفس كلامه -لغة وحده- وما يحتاج نتعلم هاللغات وقواعدها وعبالتها؟

لا والمشكلة هالأيام حتى داخل اللغة الوحده الناس تفهم بعضها البعض غلط وهالمشكلة ما تكون من اللغة كثر ما تكون من الأشخاص وقدرتهم على التواصل.

اللي وصلت له بالنهاية والله أعلم هو:

المحيط يحكم اللغة بشكل كبير.

يعني على فرض الحين طقينا رستارت والكل قام يتكلم عربي بالعالم، بعد سنوات راح نشوف اللهجات تبدي تبين، وبعد هم سنوات ثانية راح تتشعب لغات ويبين الاختلاف من اول ويديد.

ليش؟

كل دولة وكل مجتمع يحتاج يستخدم كلمات أكثر من غيرها، وهم نلقاه يهمل كلمات ثانية بالمقابل. مع الوقت راح نشوفهم يقولون هالكلمات المهمة بسرعة أكبر أو يختصرونها أو يميزونها بحركة باللسان مثلا. وبالعكس الكلمات الغير مهمة تبقى على حالها أويمكن ينسونها عالمدى الطويل وما يشوفونها إلا بالكتب التاريخية، مثل بمجتمعنا الكويتي والكلام القديم اللي الأجيال اليديدة ما تفهمه ولا تتعلمه ويروح.

هم يساعد هالشغلة الدعم الديني اللي مر عبر التاريخ حق اللغات، مثل عندنا الإسلام يعتبر اللغة العربية هي اللغة الأولى والمسلمين كلهم يصلون خمس مرات باليوم بالعربي لا غير. هاللغة بقت في منطقة كبيرة من العالم بسبب هالدعم ولآلاف السنوات، مع ذلك نشوف اللهجات واضحة الاختلاف بسبب اختلاف البيئة وتأثير الاستعمار على بعض المناطق.

حتى لو نطالع داخل الدولة الوحده، نلقى طبقات الناس تتكلم غير ،طبقة الدخل المحدود والوسطى والأغنياء في فرق بين كلامهم.

الأطباء يتكلمون غير عن التجار غير عن المزارعين، مو بس بمجال تخصصهم يعني، حتى بالأمور العامة فيه فروق طفيفة بالكلام.

الدينين يتكلمون غير عن الـ”مو متدينين” أو حتى العاديين.

يعني حتى بالديرة الوحده بتشوف اختلاف لغوي، شلون ما نشوف اختلاف أكبر على مستوى العالم بين دولة ودولة وكل واحد له تاريخ مختلف وبيئة مختلفة وثقافة مختلفة ووضع اقتصادي مختلف …الخ؟

قول زين ما عندنا لغات أكثر من اللي عندنا الحين يمعود

مع ذلك كله هم حاولوا يطورون لغة عالمية، سموها Esperanto!


إيلييزر زامينوف - Eliezer Zamenhof
اكتشف اللغة وحط قواعدها واحد اسمه إيلييزر زامينوف (Eliezer Zamenhof) سنة 1887م. إسم اللغة إسبيرانتو باللغة نفسها يعني (one who hopes) أو بالكويتي المتأمل أو صاحب الأمل.

كان هدفه انه يسوي لغة سهلة التعلم على الكل عشان يحسن من فرص السلام والتفاهم بالعالم. الحين عالمياً يقولون في ألف واحد يتكلم هاللغة كلغة أولى أصلية. بس كاستخدام عام الاحصائيات متفاوتة بين 10 آلاف إلى مليونين متحدث.

ماكو دولة متبنية اللغة رسمياً بس اليونيسكو معترف فيها من سنة 1954 ومستخدمة ببعض المجالات الدولية والإعلامية والأدبية.

الحلو انه ثابت علمياً اللي يتعلم هاللغة راح يتعلم باجي لغات العالم بسرعة وسهالة أكبر

اللغة مكونة من 28 حرف كالتالي:

a b c ĉ d e f g ĝ h ĥ i j ĵ k l m n o p r s ŝ t u ŭ v z

وانا عبالي هالأحرف بس حق تزيين أسامي المسنجر والشات

ما عليه سامحوني ما توقعت أطول بهالموضوع هالكثر بس خلصت ارتاحوا!
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://alabda.ibda3.org
 
ليش العالم يتكلم أكثر من لغة؟
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات مدرسة الأبداع الأهلية بالقطن :: الاقسام العامه :: المنتدى العام-
انتقل الى: